فاكر النكتة القديمة دي؟ مرة واحد قابل واحد قال له الساعة كام؟ قال له مش معايا ساعة والله.. قال له ياااه أنا كده اتأخرت..

ده بالضبط اللي بييجي في بالي كل ما حد يبعت لي انه بقى عنده كذا سنة وانه ما حققش اللي زمايله أو اللي في سنّه حققوه وشايف انه كده اتأخر وخايف يكون فاته القطر ومش هيقدر يحقق حاجة في حياته..

ما حدش معاه ساعة يقول لك على أساسها انك اتأخرت.. واللي يقول لك انت اتأخرت بيقولها على أساس حدود نفسه وخبراته واللي شافه.. لكن كل ما يشوف أكتر ويعرف أكتر هيفهم ان مش معاه ساعة وان ما حدش معاه ساعة فعلا..

ما تشغلش نفسك بالمقارنات والتفكير الزائد.. ركز في حياتك واعمل في اللي ايدك..

وما أجمل حديث الرسول صلى الله عليه وسلم..

"احرص على ما ينفعك.. واستعن بالله ولا تعجز.. وإن أصابك شيء فلا تقل لو أني فعلت كان كذا وكذا.. ولكن قل قدّر الله وما شاء فعل.. فإن لو تفتح عمل الشيطان"..