#Bitcoin ລາຄາຜັນຜວນແຮງ ຈະເປັນເງິນໄດ້ແນວໃດ!!!. ກະແມ່ນລາຄາ bitcoin ເບິ່ງຄືຜັນຜວນເມື່ອທຽບກັບສະກຸນອື່ນໆ ແຕ່ກໍຍ້ອນວ່າ ມັນຫາກໍມີອາຍຸ 15 ປີ ຕະຫລາດກຳລັງຫາລາຄາທີ່ແທ້ຈິງຢູ່, ທຸກຄົນສາມາດແລກປ່ຽນ (ຊື້-ຂາຍ) ໄດ້ຕະຫລອດ 24/7 ແລະ ທົ່ວໂລກ ກໍບໍ່ແປກທີ່ລາຄາຈະມີການປ່ຽນແປງທີ່ໄວ ແລະ ຮຸນແຮງ ຕາມກິເລດຂອງມະນຸດ. ແຕ່ຖ້າທຽບກັບເງິນ fiat ຢ່າງ ກີບ ຖ້າບໍ່ມີກົດຫມາຍບັງຄັບໃຫ້ໃຊ້ ແລະ ຕົວຢ່າງຫລ້າສຸດທີ່ມີການເກັບ ຄ່າທຳນຽມ 0.5% ຂອງການເຮັດທຸລະກຳເງິນ ໂດລາ ເຊິ່ງຈຸດປະສົ່ງກໍເພື່ອບີບໃຫ້ຄົນ ເຮັດທຸລະກຳເປັນ ເງິນກີບ ແທນ ແຕ່ເຖິງປານນີ້ແລ້ວ ເງິນກີບ ກໍຍັງມີຄ່າພຽງໃນປະເທດລາວເທົ່ານັ້ນ ບໍ່ສາມາດໃຊ້ນອກປະເທດໄດ້. ຖ້າບໍ່ມີກົດຫມາຍເຫລົ່ານີ້ ແລະ ຢູ່ເປັນອິດສະຫລະຄື Bitcoin ຈະບໍ່ມີໃຜເກັບເງິນກີບ ຄົນສ່ວນຫລາຍກໍຈະຫັນໄປເກັບເປັນເງິນສະກຸນອື່ນຫມົດ ເພາະຜູ້ຄົນຈະຮັບຮູ້ເອງວ່າ ເຂົາເຈົ້າຈະເກັບເງິນຫຍັງຈຶ່ງຈະຮັກສາມູນຄ່າໄດ້ ແລະ ຈະເຮັດໃຫ້ເງິນກີບມີຄ່າເຂົ້າໃກ້ສູນເມື່ອທຽບກັບສະກຸນອື່ນໆ.

ຫລາຍຄົນເວົ້າວ່າ ແຕ່ລະປະເທດຕ້ອງມີສະກຸນເງິນທ້ອງຖິ່ນຂອງຕົວເອງເປັນເລື່ອງປົກກະຕິ ບໍ່! ນີ້ບໍ່ແມ່ນເລື່ອງປົກກະຕິ ມັນເປັນມາດຕະຖານທີ່ຫາກໍເຮັດມາປະມານ 50 ປີປາຍມານີ້ ແຕ່ກ່ອນແມ່ນອາດຈະມີສະກຸນທ້ອງຖິ່ນຢູ່ແຕ່ຈະຖືກ backed ດ້ວຍທອງຄຳ (Gold Standard) ຈະບໍ່ມີບັນຫາອັດຕາແລກປ່ຽນ ເພາະເງິນທີ່ໃຊ້ວັດມູນຄ່າແທ້ໆ ຄືທອງຄຳ ເຊິ່ງກໍເວົ້າໄດ້ວ່າ ທົ່ວໂລກໃຊ້ສະກຸນເງິນດຽວກັນຢູ່.