Il Foglio 18/11/2025: "Lingua veneta" e fra parentexe "(chiamato Lingua e non dialetto, anche se per la quasi totalità dei linguisti quello veneto è un dialetto)".

E ghe risemo co' ƚe sòƚite vacade da schincapene de servisio democratista.

Ƚa totalità (e nò ƚa "quasi totalità" reclamada dai sociaƚisti gaxetinari) de i lenguisti (se no i xé inte'l nùmaro no i xé lenguisti) no i atribuise (da lenguisti) nisuna difarensa a ƚe paròƚe "lengua" e "diaƚèto". Se trata cioè de cuel che un grupo de persone pì o manco estexo ƚe parla de acòrdo fra de ƚore, e no pol èsarghe distinsion posìbiƚe, semantegamente e par senso ontolòxego de parlanti e parlade. Ƚa distinsion ƚa vien fata nòma che da ƚa poƚédega, e non in senso garantista (maco che manco sjentìfego).

Caxo mai xé da xontar un agetivo a "lengua" co se vòja riferirse a altro:

xé da ramentarse senpre còsa che NO 'L XÉ lengua: l'Italiano no'l xé lengua, el xé un modèƚo lenguìstego (lengua artificial, lengua burocràtego-funsional, lengua franca codifegada, ect..) che no'l xé parlà da nisuni (calcheduni i crede de parlarlo parché no i gà idèa de còsa che vòja dir). Cusì come no existe un "Inglexe" parché fra Merican, Xelandexe Londinexe, Spanglish e altri "Inglexi" ghe ne pasa de difarense, sarìa da réndarse conto che Dante el gaveva anca ƚe so idèe baƚenghe (e proto-rasiste) ma i tenpi de Dante i xé fenìi; dèso xé i tenpi de'l costrutivismo social vioƚento, agresivo e sociaƚista, fruto de ƚa Revoƚusion taliana (ciamada "Risorgimento" in "Italiano" e escluxivamente in Italia), in cui ƚa "lingua italiana" ƚa xé un stromento come tanti altri par far che i "aventi diritto al voto" i pòse far i sò còmodi so ƚa pèƚe de calchedun altro.